Пацини со 2 гола во 2 минути му донесе важна победа на Милан

„Росонерите“ вечерва на два пати на Сан Сиро се враќаа од гол минус за на крај да слават со убедливи 4:2 над Катанија во последната средба од 34. коло во Серија А.

До 75. минута играчите и навивачите на Фиорентина се надеваа дека Катанија може до изненадување на Сан Сиро во пресметката со фаворитот Милан.

Евентуален кикс на „росонерите“ на домашен терен ќе значеше останување на третото место на табелата за екипата од Фиренца, која денеска со 3:0 славеше во Џенова над Сампдорија.

До таа 75. минута Катанија имаше предност од 2:1 и најавуваше изненадување, кое на крајот сепак изостана откако Милан во последните 15 минути од средбата постигна три погодока за на крајот убедливи 4:2 во своја корист.

Голема заслуга за овој триумф на домаќинот има Џампаоло Пацини, кој во две и пол минути му помогна на својот тим од 1:2 да дојде до 3:2. Во финишот Марио Балотели од белата точка го постави конечниот резултат.